Færsluflokkur: Stjórnmál og samfélag

Þetta er orðið gott

Hr. Björn Bjarnason hefur enn einu sinni opinberað eðli sitt fyrir þjóðinni. Allar hugmyndir um það hvernig má koma manninum frá eru vel þegnar. Ekki stinga upp á að strika hann út í næstu kosningum, það hefur verið reynt Sick.

Ef einhver broddur væri í þingmönnum Samfylkingarinnar myndu þeir mótmæla síðasta útspili Björns kröftuglega. Þeir geta ekki verið stikkfrí í máli Kenýamannsins Paul Ramses, sem af fréttum að dæma hefur ekkert til saka unnið annað en að taka þátt í stjórnarandstöðu í sínu heimalandi. Björn Bjarnason starfar jú að hluta til í skjóli Samfylkingarinnar.

Í skjóli Samfylkingar starfar einnig Geir Haarde, sem virðist algjörlega ráðalaus þegar kemur að því að leysa efnahagsvanda þjóðarinnar. Síðasta bullið í honum, að jafnvel væri skynsamlegra að taka upp dollar en evru er t.a.m. hlægilegt. Sérstaklega athyglisvert í ljósi þess að maðurinn er hagfræðingur, eins og einhver bloggarinn benti á Wink

 


Röfl dagsins

Ég ætla að halda áfram að röfla um verðmuninn á bensíni og díselolíu hér á landi. Lítrinn af díselolíu er  nú u.þ.b. 17 kr. dýrari en bensínlítrinn og eins og ég talaði um í síðasta röfli þá er þar víst heimsmarkaðsverði um að kenna. Ég veit að þessi verðmunur er ekki séríslenskt fyrirbrigði, t.d. var verðmunurinn svipaður í Bretlandi síðast þegar ég vissi, en einhverjar þjóðir, t.d. Danir, hafa tekið það upp hjá sér að sporna við þessari þróun með aðgerðum af hálfu ríkisins. Í Danmörku er dísellítrinn enn heldur ódýarari en bensínlítrinn, svona eins og manni finnst að það eigi að vera.

Ég hef í 3 ár átt sparneytna díselbíla. Fyrst Skoda Octavia og síðan Volkswagen Touran. Þessir bílar eru mjög sparneytnir, eyða á við japanskan smábíl, en eru þrátt fyrir það fullbúnir fjölskyldubílar. Vegna stærðar sinnar eru þeir talsvert öruggari en japanskir smábílar, skyldi maður ætla a.m.k., og eins hef ég heyrt sérfræðinga halda því fram að þeir mengi minna en smábílarnir. Jafnvel álíka lítið og hybrid og prius og hvað þessir umhverfisvænu tískubílar heita. En nú er svo komið að það er tæpum þúsundkalli dýrara fyrir mig að fylla bílinn en fyrir Yaris-eiganda! 

Ég hefði haldið að það væri af hinu góða fyrir íslenskt samfélag að sem flestir ættu örugga, sparneytna og umhverfisvæna bíla, að svo miklu leyti sem bíll getur verið umhverfisvænn Wink, og mér skilst að það hafi dönsk stjórnvöld einmitt ályktað að væri gott fyrir danskt samfélag og þessvegna tekið völdin af hinu illræmda heimsmarkaðsverði og jafnað stöðuna milli díselolíu og bensíns. Um óákveðinn tíma, eða þar til jafnvægi næst á heimsmarkaði.

Megum við eiga von á því að íslensk stjórnvöld geri eitthvað í þessa veru? Tja........nei.


Röfl dagsins

Heimsmarkaðsverð er eitthvað sem enginn ræður við, skilst manni á olíufélögunum og íslenskum stjórnvöldum. Það stjórnar allri verðlagningu á olíu allsstaðar í hinum vestræna heimi og jafnvel þó olíufélögin geri allt sem í þeirra valdi stendur til að sporna við þessu ægivaldi þá er það nú bara þannig að bensínið verður að kosta 179 og dísel 192. Þessvegna finnst mér dálítið skrýtið að sjá að í Danmörku, þar sem ég spóka mig nú í heljarinnar hedebölge, kostar díselið heldur minna en bensínið. Rétt eins og tíðkaðist á Íslandi lengi vel. Það væri gaman að vita hvaða séríslensku aðstæður eru þess valdandi að dísellítrinn þarf að vera 13 krónum dýrari en bensínlítrinn........

Maður dagsins - alla daga!

bjornavigripÉg hreinlega veit ekki hvar ég á að byrja að mæra þennan snilling, þannig að ég læt myndina duga í bili. Maður einhvernveginn finnur fyrir vanmætti gagnvart honum, bara með því að sjá hann á mynd.

Eitt er víst, að ekki hefur verið töluð vitleysan á æskuheimili hans Whistling.

Njótið heil Smile.


Aumingja Magnús Þór....

.....Hafsteinsson. Líklega hefur hann í sjálfu sér talað fyrir munn nokkuð margra þegar hann ljáði fyrst máls á innflytjendavandamálinu á Íslandi í þinginu, skömmu fyrir síðustu kosningar. Eins hafa eflaust einhverjir fagnað framgöngu hans í máli hinna 30 palestínsku flóttamanna sem eru á leið upp á skaga. Þó hugsa ég að færri hafi verið sammála honum í því máli.

Ekki veit ég hvað honum gengur til með þessum tilburðum. Ég á bágt með að trúa því að hann sé sá rasisti sem sumir vilja meina að hann sé, þótt erfitt sé stundum að lesa annað úr framkomu hans. En ég á ekkert síður erfitt með að sjá að endurteknar aðfinnslur hans geti flokkast sem vinsamlegar ábendingar, eins og hann vill gjarna láta eftir að hann hefur varpað sprengjunum og allt er farið í bál og brand.

Allar springa sprengjurnar svo í andlitið á honum á endanum. Flokkssystir hans á skaganum ákvað að hlusta ekki á þvaðrið í honum, munstraði sig í annan flokk á 0,1 og skildi varaformanninn eftir valdlausan og einangraðan. Síðan geysast pennafærir menn eins og Þráinn Bertelsson og Guðmundur Andri fram á ritvöllinn og hæða hann og spotta á svo snilldarlegan hátt að erfitt er að ímynda sér að hann eigi sér viðreisnar von. Hann sem var kannski bara að segja það sem enginn annar þorði að segja?

Auðvitað erum við Íslendingar þess umkomnir að taka við flóttafólki. Það er ekki spurning. Rétt eins og innflytjendum af öllum stærðum og gerðum. Sé rétt að slíkum málum staðið gerir það ekkert annað en að auðga mannlífið. En það er rétt hjá Magnúsi að við þurfum að standa miklu betur að þessum málum öllum hér á landi. Það sem mér innst sorglegast er að við skulum ekki hafa borið gæfu til þess að leita ráða hjá nágrannaþjóðum okkar, sem hafa áratugareynslu í þessum efnum og hafa í gegnum tíðina staðið frammi fyrir öllum þeim vandamálum sem nú blasa við okkur.

En að halda því fram að lífskjör fólks á Akranesi séu með þeim hætti að samfélagið þar sé ekki að svo stöddu þess umkomið að taka á móti nokkrum stríðshrjáðum flóttakonum frá Palestínu er grátlega kjánalegt.    


Evrópusambandið

Umræðan um hugsanlega inngöngu Íslands í ESB er enn eina ferðina komin út í skurð. Þorgerður Katrín fór aðeins fram úr sér á fundi í vikunni og sagðist vera til í að skoða málið, sagðist raunar vera þeirrar skoðunar að Sjálfstæðisflokkurinn ætti að leiða Evrópuumræðuna á Íslandi! Einmitt! Er það ekki svipað og að láta Steingrím J. stjórna ráðstefnu um framþróun?

Það stóð ekki á viðbrögðum flokksbræðra Þorgerðar. Geir Haarde gerði strax lítið úr ummælunum og reyndi að svæfa umræðuna og Björn Bjarnason firrtist við og bunaði út úr sér sínum venjulegu útúrsnúningum og órökum, m.a. einhverju tuði um að ESB aðild myndi ekki bjarga illa reknum íslenskum fyrirtækjum! Það er auðvitað alveg rétt hjá Birni, en ég man ekki eftir því að nokkur maður hafi haldið því fram að það myndi sjálfkrafa gerast.

Hinsvegar er það þannig að ef Björn og félagar hefðu ekki staðið á Evrópubremsunni í öll þau ár sem þeir hafa séð um stjórn efnahagsmála á Íslandi værum við ekki í þeirri stöðu að hegðun þessara heimskulega reknu fyrirtækja nýríkra flokksbræðra Björns hefði svo mikil áhrif sem raun ber vitni. Evran er nægilega burðug til að standa af sér bjánagang á borð við gjaldeyrisbrask íslensku bankanna - krónan ekki. Svo einfalt er það. Ef við hefðum borið gæfu til að koma okkur inn í hlýjuna í BrusselWink í valdatíð meistara Davíðs sætum við ekki uppi með gjaldmiðil sem er álíka ónýtur og samningsstaða okkar í hugsanlegum aðildarviðræðum er orðin. 

En það er alltaf hægt að segja ef og hefði. Við verðum að lifa með því að hér hefur Sjálfstæðisflokkurinn slegið á alla umræðu um ESB aðild. Við verðum líka að lifa með því að eitt af því sem Samfylkingin samþykkti þegjandi og hljóðalaust til að komast í stjórn með Birni og félögum var að vera ekki að pirra þá með ESB-fjasi. Í því sambandi talaði forystusveit flokksins um að minni hagsmunum hefði verið fórnað fyrir meiri. Mér liði betur að hafa séð það á framgöngu flokksins í ríkisstjórninni hingað til hvaða "meiri hagsmuni" er um að ræða. Hef ekki komið auga á þá enn sem komið er a.m.k. 

Andstæðingar aðildar tala sumir hverjir um að Evrópusinnar séu bláeygir draumóramenn sem sjái ESB í hyllingum og þrái ekkert heitar en að komast í hlýjuna í Brussel og baða sig upp úr digrum sjóðum sambandsins. Það er heldur lágkúrulegur málflutningur þykir mér. Auðvitað er ESB ekkert Bjarmaland, það held ég að engum detti í hug. Við verðum hinsvegar að fara að koma okkur upp úr því fari sem umræðan hefur verið föst í hér á landi í allt of mörg ár og fara að vega kosti og galla hugsanlegrar aðildar af alvöru.

Ég er enginn sérstakur aðdáandi ESB, síður en svo. Í grunninn finnst mér það bákn allt saman fremur óspennandi, en það er nú samt þannig að við erum nú þegar búin að taka upp fjöldann allan af reglum ESB í tengslum við EES samninginn og því þá ekki að taka skrefið til fulls? Hafa atkvæðisrétt og fá að auki nothæfan gjaldmiðil. Ef eina leiðin til að losna við krónuna er að ganga í ESB er ég til. Það heitir að fórna minni hagsmunum fyrir meiri.

Ég held að efnahagslífið á Íslandi versni allavega ekki við inngöngu í ESB. Jafnvel þó forsætisráðherrann leyfi sér að halda slíku fram, á milli þess sem hann segir að það sé ekki tímabært að ræða um kosti og galla hugsanlegrar ESB-aðildar!

Ég gæti haldið endalaust áfram, en ég veit að það nennir enginn að lesa svona langa pistla, ekki heldur ég Blush. Ég verð samt að bæta því við að ég er orðinn hundleiður á að heyra Björn og Geir o.fl. benda á að Noregi og Sviss farnist vel utan ESB, og nota það sem rök fyrir því að Ísland eigi ekki að ganga í ESB! Það er fráleitt að bera Ísland saman við þessar þjóðir, þær eru stórveldi samanborið við Ísland. Báðar þjóðir eiga digra sjóði og gætu rétt þjóðarskútuna okkar við án þess að finna fyrir því. Ársvextirnir einir á olíureikningi norðmanna myndu duga til þess. 


Eðli, gáfnafar o.fl.

Soffía vinkona mín fer ekki fögrum orðum um sjálfstæðismenn á blogginu sínu. Ég man ekkert hvernig maður gerir svona flotta tengla, en hún er í bloggvinavalmyndinni hér til hliðar. Kallar sig Slembru.

Þau ykkar sem nennið ekki að fara eftir slíkum krókaleiðum ætla ég að upplýsa um það að megininntak ágæts pistils Soffíu er gáfnafar sjálfstæðismanna, og hún lætur jafnvel að því liggja að það sé heldur rýrara en annarra þjóðfélagshópa Wink.  

Sjálfur held ég að sjálfstæðismenn séu ekki vitlausari en við gáfaða fólkið sem stendur utan flokksins, síður en svo. Ég á sjálfur marga góða vini í flokknum og þeir eru alveg þrælgáfaðir Smile

Ég held að þetta sé frekar spurning um lífsstíl, eða eitthvað slíkt. Það er eins og eðli sjálfstæðismanna sé ólíkt eðli okkar hinna. Hlutirnir eru einhvernveginn einfaldari í þeirra augum, og það held ég að þurfi alls ekki að vera slæmt.

Lífsspurningar þeirra eru t.d. sjaldnast mjög djúpar, og alls ekki eins tilgerðarlegar og hjá sumu fólki í öðrum flokkum. Raunar sýnist mér að oftast séu þær svona já og nei spurningar; Er Sjálfstæðisflokkurinn bestur? (já), eru kommúnistar vondir? (já), er Bush fífl? (nei).

Svörin við þessum já og nei spurningum hafa þeir ekki alltaf á reiðum höndum, en þá er alltaf hægt að leita til góðra ráðgjafa flokksins sem eru afar ósérhlífnir þegar kemur að því að leggja skoðanalegar flokkslínur.

Hannes Hólmsteinn er einn þessara sérfræðinga, hann kvað t.d. upp úr með það fyrir nokkrum árum að George W. Bush væri afburða gáfaður. Síðan þá hef ég ekki heyrt einn einasta sjálfstæðismann hallmæla Bush. Ekki einu sinni þá sem héldu í einfeldni sinni að maðurinn væri jafn vitlaus og framkoma hans og gjörðir segja til um!

Ein af þeim já og nei spurningum sem sjálfstæðismenn hafa lært rétta svarið við er sú hvort sjálfstæðismenn séu klárari en við hin í að fara með peninga. Svarið við henni er afdráttarlaust já, og hefur verið það svo lengi sem ég man eftir mér. En nú ber svo við að flokkurinn hefur meira og minna séð um efnahagsmál þjóðarinnar í hartnær 2 áratugi, og hvar stendur þjóðin? Í miðjum drullupolli, með stuttbuxurnar niðrum sig.

Ég ætla ekki að ræða innkomu bankanna á húsnæðismarkaðinn, baráttu sjálfstæðismanna við að leggja íbúðalánajóð niður, andstöðuna við að taka upp evru, Pétur Blöndal, Birgi Ármannsson,  o.s.frv.......það væri að æra óstöðugan. Ég ætla ekki heldur að ræða málefni LSH og framgöngu Guðlaugs Þórs Þórðarsonar þar - en þau dæmalausu vinnubrögð sem hann og sérfræðingar hans hafa viðhaft í kjaradeilum við hjúkrunarfræðinga koma á endanum til með að kosta ríkið margfalt meira en það hefði kostað að ganga að öllum þeim kröfum sem hjúkrunarfræðingar lögðu fram í upphafi viðræðnanna! Hann sem sagðist hafa kynnst innviðum heilbrigðiskerfisins svo vel þegar hann kveikti í rassinum á sér í fyrra!  

Málefni LSH minna mann á það að Sjálfstæðisflokkurinn vinnur í grunninn enn eftir úreltri hugmyndafræði Milton Friedman og félaga, sem Hannes Hólmsteinn mælti einmitt mjög hvatlega fyrir á 9. áratugnum. Það er í raun hreint ótrúlegt hve margt af því sem sjálfstæðisflokkurinn er að bjástra við þessi misserin minnir óþægilega á Bretland á tímum Margaret Thatcher. Það virðist sem flokkurinn hafi lífssýn hennar enn að leiðarljósi, þrátt fyrir að m.a.s. örgustu íhaldsmenn í Bretlandi viðurkenni að hún hafi gert meira ógagn en gagn á sinni tíð.

Það eru a.m.k. 10 ár frá því að bretar hófu að reyna að "rétta heilbrigðiskerfið við", eftir aðför Thatcher-stjórnarinnar að því. Samt sem áður veljum við að feta sömu braut og frú Thatcher Sick.

Þá dettur mér í hug já og nei spurning: Var Thatcher töff?  


Tindátar Björns Bjarnasonar, þess mikla gáfumennis

Landsþing lögreglumanna (líklega ekki töluð vitleysan þarWink) fer fram á að öllum lögreglumönnum verði útveguð Taser-valdbeitingatæki sem allra fyrst.

Ég veit ekkert hvernig tæki þetta eru, en í Fréttablaðinu í dag segir að um sé að ræða öflug rafstuðstæki sem dauðsföll hafi verið rakin til.

Í greinargerð með ályktuninni segir að óþarft sé að tefja málið með skoðunum! Lýsir það ekki lögreglunni vel? Verum ekkert að skoða eða ræða málin, grípum heldur til vopna!

Þegar íslenskir lögreglutöffarar (GAS!) fá byssur er vísast best að drífa sig af klakanum.

Ég verð að láta fljóta með sniðug ummæli Jónasar Kristjánssonar um piparúðann (GAS!) sem löggan notaði af mikilli áfergju í "óeirðunum" um daginn. Á síðu sinni www.jonas.is segir hann rangt af fjölmiðlum að kalla piparúðann varnarúða; "Mér sýndust löggurnar með úðann ekki vera í neinni vörn. Fremur virtust þær vera að fá fullnægingu."
   


Firring?

Íslendingar hafa greinilega haft það of gott, of lengi. Talsmaður Seðlabankans hreykir sér af því í einhverju blaðanna í gær að bankinn hafi sýnt gríðarlega aðhaldssemi við kaup á jeppa, sem bankanum er nauðsynlegt að eiga til að geta fylgst með rándýrum sumarhúsum sínum. Jeppinn kostaði einungis tæpar 8 milljónir króna, sem talsmanninum þykir hlægilega lítið.

Í Fréttablaðinu í dag birtist uppskrift af fiski- og kartöflusalati sem blaðið segir henta vel á krepputímum. Í uppskriftinni er meðal annars dálítið af humri Smile

Þetta minnir mig á drottninguna  (held það hafi verið Marie Antoniette sem var drottning í Frakklandi á tímum byltingarinnar) sem spurði einn af ráðgjöfum eiginmanns síns af hverju lýðurinn væri með þennan æsing. Þegar henni var svarað að lýðurinn væri sár og reiður yfir því að hafa ekkert brauð að borða spurði hún steinhissa: "Af hverju fær fólkið sér þá ekki bara kökur?"


Nýr kjarasamningur

Skrifað var undir nýjan kjarasamning kennara í gær. Í greinargerð með samningnum segir að aðalmarkmið Félags grunnskólakennara hafi náðst, en það var að jafna laun kennara á við sambærilegar stéttir.

Sambærilegar stéttir hafa í rúmt ár haft umtalsvert hærri laun en grunnskólakennarar, gegnumsneitt u.þ.b. 30 þúsund sýnist mér. Samkvæmt samningnum munum við ná þeim launum sem þær stéttir, t.d. leikskólakennarar, hafa núna eftir rúmt ár!

Þetta þýðir gróflega að sambærilega menntaður leikskólakennari hefur haft um 360 þúsundum hærri laun en kennarar s.l. ár, og mun hafa eitthvað hærri laun í 6-12 mánuði til viðbótar hið minnsta.

Hvernig getur það kallast jöfnun á við sambærilegar stéttir?  


Næsta síða »

Innskráning

Ath. Vinsamlegast kveikið á Javascript til að hefja innskráningu.

Hafðu samband