Golf

Golf er dálítið skemmtileg íþrótt. Það getur verið ljómandi gaman að labba einn golfhring með góðum félögum, skjóta nokkur vond högg og eitt og eitt gott, týna nokkrum boltum og spjalla saman um heima og geima á meðan. Ég hef farið einn og einn hring á hverju sumri undanfarin 10 ár c.a., semsagt aldrei tekið íþróttina föstum tökum. Frekar litið á golfið sem skemmtilega dægradvöl.

En þó golfið sé skemmtileg íþrótt verð ég að segja að það er með eindæmum hversu mikið af leiðinlegu fólki stundar hana! Ef þú fyllist einhvern daginn löngun til að hitta uppskrúfaða verðbréfasala í Lacoste treyjum og röndóttum buxum bera saman verð á sínum eigin golfsettum og ræða hugsanleg kaup á nýjum treyjum eða sólderum, eða illa krumpaða sólbrunna ellilífeyrisþega sem líta fyrirlitningaraugum á þig um leið og þeir ryðjast framfyrir og veifa fínu skírteinunum sínum, þá er óbrigðult ráð að trilla sér í næsta golfskála. Eins ef þú hefur gaman af að lesa reglur í boðhætti (borgið, lagið, farið, virðið) í bland við hver golfari skal, ekki er heimilt, óheimilt er með öllu o.s.frv... .

Öll þessi uppskrúfaða vitleysa í kringum golfið gerir það að verkum að þetta er eitt mesta fábjánasport nútímans. Póló á ekki breik í þetta montsport! 

Ég á Dunlop golfsett sem ég keypti í Bónus á 7990 kr.- Ég á ekki golfskó, ekki tíglapeysu og ekki heldur röndóttar buxur. Og ég mun aldrei kaupa mér Lacoste bol.

Athugasemdir

[Hjalti Árnason, 22.7.2008 kl. 20:03]

Ég er sammála þér, nema þú gleymdir koníakspelanum. Hann er allavega ómissandi í miðnæturgolfi (Svona í lok ágúst!). Ég pantaði óvart Lacoste bol í póstkröfu árið 1986. Hann var sem betur fer nokkuð mörgum númerum of lítill. En hann leit nákvæmlega út eins og þeir gera í dag. Gengur annars nokkur gagnkynhneigður í svona löguðu?? Ég bara spyr.

[Rilli (IP-tala skráð) 26.7.2008 kl. 12:59]

Margt til í þessu gamli....en við þurfum samt að láta verða af  því að taka hring, engin hætta á að ég drekki  þér í tísku eða galgopahætti því ég á ekki einu sinni derhúfu!   En annars er maður farinn að flokkast með kynlegum kvistum af því ég hef ekki frá neinum golftengdu að segja í kaffi og matartímum...get varla beðið eftir vetrinum og að enski boltinn byrji....þá hjaðnar mesta golfjarmið.   Var reyndar afar óþolandi tímabil þegar golfunnarar héldu að Birgir Leifur væri að nálgast Tigerinn....þvílíkt hype og í öll þessi ár!

[Heimir Eyvindarson, 28.7.2008 kl. 10:04]

Hjalti: Maður pantar ekkert Lacoste í misgripum! Þetta er léleg afsökun, þú átt örugglega fullan skáp af þessu drasli .

Rilli: Það er ekki spurning að við þurfum að taka hring! Bara eitt símtal frá Rilla austur fyrir fjall og gamli þeytir á könnuna og tekur möndluköku úr frystinum .