Sé þig seinna

Í dag, fimmtudaginn 16. október, er komið að því að hljómsveitin Á móti sól sendi frá sér nýtt lag. Lagið er það þriðja sem við sendum frá okkur á árinu, hin tvö eru Árin; sem ég samdi sjálfur og Til þín; sem Magni samdi.

Lagið heitir Sé þig seinna og er heldur léttara en síðustu tvö lög okkar, enda ekki við hæfi á þeim erfiðu tímum sem yfir þjóðina ganga um þessar mundir að drekkja þjóðinni í tregafullum ástarsöngvum. Lagið er eftir mig og verður frumflutt í þætti Ívars Guðmundssonar á Bylgjunni kl. 10.30, eftir að við Ívar höfum skipst á athugasemdum um efnahagsástandið og fleira sem brennur á okkur . Það er áralöng hefð fyrir því að Ívar frumflytji lög hljómsveitarinnar og við breytum að sjálfsögðu ekki út af þeirri venju, enda íhaldssamir sveitamenn þegar allt kemur til alls.

Seinna í dag má heyra lagið hér á síðunni og á bloggsíðu hljómsveitarinnar sem hægt er að komast inná hér til hliðar. Einnig verður frá og með deginum í dag hægt að nálgast lagið, sem og flest önnur lög okkar, inn á www.tonlist.is, en nýverið tókust sögulegar sættir með okkur og forráðamönnum þeirrar ágætu síðu. Þar á bæ eru menn því í óðaönn við að setja gömlu lögin okkar inn á nýjan leik. Nú þegar eru nokkur lög komin inn aftur en það eru fleiri á leiðinni.

   

Það má að lokum bæta því við að þetta nýja lag var samið í Hveragerði í maí og tekið upp að mestu í Lundgård studios í Danmörku í júní og júlí. Viðbótarupptökur fóru síðan að venju fram í Stúdíó Sýrlandi í Reykjavík og gamla Hljóðrita í Hafnarfirði nú á haustmánuðum.

Athugasemdir

[Daði Georgsson, 16.10.2008 kl. 04:12]

Moll?

[Soffía Valdimarsdóttir, 16.10.2008 kl. 14:30]

Laglegt!

[Björk (IP-tala skráð) 16.10.2008 kl. 15:07]

Æðislega Flott lag

[Heimir Eyvindarson, 16.10.2008 kl. 19:12]

Daði: Moll er bannaður um þessar mundir!

Soffía, Björk og Inga Jóna: Takk

[Heiðrún Dóra Eyvindardóttir (IP-tala skráð) 16.10.2008 kl. 19:50]

Mikið var það þér líkt að setjast niður eftir miðnætti og segja frá því að þú ættir að vera í útvarpinu kl. 10 næsta morgun! Ótrúlegur! Ég er nú samt búin að hlutsta á lagið og það er flott

[Jan (IP-tala skráð) 19.10.2008 kl. 20:46]

Þetta er frábært lag. Endilega haldið áfram að semja góða tónlist.