Nú skil ég ekkert lengur

Ég ætla að leyfa mér að halda fram að ég sé ekki nema í meðallagi vitlaus. Samt sem áður skil ég ekki hvaða farsi er í gangi með barnabæturnar, eftir að rausnarlegur aðgerðapakki til handa heimilunum í landinu var kynntur á dögunum.

Böðvar Jónsson, aðstoðarmaður dýralæknis í fjármálaráðuneytinu, segir á Vísi.is að barnabætur hafi verið greiddar þrjá mánuði fram í tímann þann 1. nóvember s.l. og því komi barnabætur næst til útborgunar þann 1. febrúar. Þá geti fólk, í samræmi við fyrrnefndan aðgerðapakka, valið hvort það kjósi að fá bæturnar borgaðar þrjá mánuði fram í tímann - eða dreifa greiðslunum eitthvað!!!

Ég verð að viðurkenna að ég skil hvorki upp né niður í þessu. Nú hvarflar ekki að mér að rengja þennan mann, en úr því að barnabætur voru borgaðar þrjá mánuði fram í tímann þann 1. nóvember þá hefur það væntanlega verið þannig um nokkurt skeið. Hvernig dettur mönnum þá í hug að einhver muni kjósa það frekar að fá þær einungis borgaðar einn mánuð fram í tímann? Og hvaða erindi átti slík breyting inn í sérstakan aðgerðapakka til bjargar fólki í fjárþörf og greiðsluerfiðleikum?

Er einhver bættari með þetta?

Og svona í lokin: Hvernig fékk Geir Hårde það út að ríkissjóður myndi verða af vaxtatekjum vegna þessarar tilteknu breytingar? 

Athugasemdir

[Soffía Valdimarsdóttir, 3.12.2008 kl. 08:28]

Þú ert nú ekki einn um að klóra þér í hausnum yfir þessu með vaxtatekjurnar. Hann er sjálfsagt bara orðinn þreyttur kallinn.

[Heimir Eyvindarson, 3.12.2008 kl. 08:31]

Já hann hefur eitthvað misskilið þennan aðgerðapakka virðist vera, sem skýrir kannski hversu lélegur hann er..........semsagt pakkinn......?

[Heimir Tómasson, 5.12.2008 kl. 16:15]

En ekki kallinn? En vaxtagreiðslurnar skýrast sennilega af því að á meðan peningurinn okkar liggur inni á bók þá safnar hann vöxtum. Svo er nafnverðið greitt út til okkar en ríkissjóður heldur vöxtunum. Þetta er alþekkt t.a.m. á meðal fasteignasala þar sem kaupandi greiðir fasteign, fasteignasalinn leggur peningana inn á bók þar sem þeir safna vöxtum í einhverja daga (geta verið nokkrir þúsundkallar þegar um er að ræða jafnvel tugi milljóna) áður en þeir eru greiddir, mínus vextirnir til eiganda fésins.

Löglegt, en siðlaust að mínu viti.