Vanþakklætið í manni

Ef það er hamrað nógu oft á því að maður hafi það gott, fer maður þá að trúa því? Sjálfstæðis- og framsóknarmenn hafa að minnsta kosti veðjað á þá aðferðafræði í þessari kosningabaráttu. Það virðist gagnast öðrum flokknum ágætlega a.m.k.

Ég er óákveðinn eins og ég er alltaf fyrir kosningar og stundum líður mér ansi illa yfir því. Ég er nefnilega frekar efins um að ég muni kjósa annan ríkisstjórnarflokkanna og ég finn hreinlega fyrir sektarkennd á köflum yfir vanþakklætinu í mér. Það er nefnilega býsna erfitt fyrir óreyndan mann eins og mig að gera lítið úr því þegar tveir af valdamestu mönnum þjóðarinnar veifa plöggum sem sýna með óyggjandi hætti að við höfum hreinlega aldrei haft það betra. Mesta hagvaxtarskeið í sögu þjóðarinnar segja þeir. Þvílíkt vanþakklæti! Meira að segja Bjarni Harðarson vinur minn er hættur að tala um agúrkur og paprikur og farinn að tala um hagvöxt! Öðruvísi mér áður brá.

Ekki dettur mér í hug að rengja þessa menn, ég hef ekkert vit á hagvexti í sjálfu sér. En ég veit þó að einkaneysla og fjárfestingar hafa talsvert með hagvöxtinn að gera, held reyndar að þetta séu 2 af 4 þáttum sem lagðir eru til grundvallar þegar hagvöxtur er reiknaður.

Gríðarleg skuldsetning heimilanna í landinu hefur semsagt jákvæð áhrif á hagvöxtinn. Fólk sem tekur lán fyrir einkaneyslu og eyðir langt umfram efni eykur um leið hagvöxtinn. Í hvert skipti sem ég fer með börnin mín á læknavaktina hér á Selfossi og borga 1700 krónur er ég að auka hagvöxtinn og líklega hafa milljónirnar 3 eða 4 sem ég hef greitt sveitarfélaginu í formi leikskólagjalda aukið hagvöxtinn líka. Væntanlega hefur sprengjan á fasteignamarkaðnum sömuleiðis haft svakaleg áhrif á hagvöxtinn. Ætli fólk sem er að hefja búskap og er að reyna að eignast sína fyrstu eign sé ánægt með þetta hagvaxtarskeið? Varla. Hagvöxtur hefur nefnilega ekkert með hag fólks að gera.

Þá er hagvöxturinn kominn útaf borðinu og ég aðeins rólegri yfir því að hugsa um að kjósa hvorki Sjálfstæðisflokkinn né Framsókn. En þá kemur inn um lúguna langur loforðalisti frá báðum flokkunum og þar er hellingur af flottum hlutum sem kæmu sér vel fyrir mig, og sjálfhverfur sem ég er hugsa ég með mér að líklega þurfi ég að skoða málin aðeins betur. En svo ranka ég við mér. Ef þeir vildu virkilega gera alla þessa flottu hluti væru þeir löngu búnir að því, næg tækifærin hafa þeir fengið.

Athugasemdir

[Gestur Guðjónsson, 7.5.2007 kl. 00:18]

Á ég að segja þér Heimir, ég held að þú ættir að hugsa þig um einu sinni enn. Við viljum oft gleyma því sem búið er að gera og tökum því öllu sem sjálfsögðum hlut og förum strax að biðja um meira. Ég er þannig og ég býst við því að ég sé ekkert eyland í því. Það er þess vegna sem ég bið þig að staldra aðeins við. Getur ekki verið að það sé vegna þess að það eru fjölmörg brýn verkefni búin að það er komið að þessum sem nú eru listuð upp? Getur ekki verið að það sé vegna þess að útlit er fyrir enn meiri uppbyggingu í samfélaginu og þar með enn meiri tekjur að við sjáum fram á að geta gert enn betur? Það er engin tilviljun eða heppni að það sé svo. Það er vegna framsýni og áræðni sem það hefur gerst með uppbyggingu atvinnu sem afla aukinna tekna. Ég vil að við búum áfram í landi þar sem enn fleiri draumar okkar rætast og það gerist bara ef við höfum efni á því. Þess vegna kýs ég Framsókn og skora á þig gera það líka.

[Heimir Eyvindarson, 7.5.2007 kl. 08:14]

Sæll og blessaður Gestur.

Ein spurning til að byrja með. Þú biður mig að hugsa mig um. Hefur þú í raun hugsað þig um eða kýstu framsóknarflokkin vegna þess að foreldrar þínir gerðu það? Hefur þú virkilega hugsað málin eins vel og þú vilt vera að láta? Ég spyr fyrst og fremst vegna þess að ég veit að þú ert vel gefinn og skortir á engan hátt vitsmuni til að geta gert slík grundvallaratriði upp við þig.

Síðan aðeins að framsýninni sem þú talar um:

1. Er það framsýni framsóknarflokksins að þakka að komugjöld á heilsugæslustöðvar hafa hækkað úr engu í 1700 krónur?

 2. Er það framsýni framsóknarflokksins að þakka að margt fólk sem ætlar að kaupa sína fyrstu eign í dag á ekki nokkra möguleika á því?

3. Er það framsýni framsóknarflokksins að þakka að ríkið borgar ekki lengur tannlæknaþjónustu barna undir 16 ára?

4. Er það framsýni framsóknarflokksins að þakka að við styðjum með ráðum og dáð stríðsrekstur í Írak?

5. Eru biðlistarnir á BUGL og Greiningarstöð framsýni framsóknarflokksins að þakka?

Viltu að ég haldi áfram?

[Gestur Guðjónsson, 7.5.2007 kl. 10:12]

Ég ætlaði einu sinni að verða sósíaldemókrat og fór með það til Danmerkur. En 6 ára dvöl mín í þar bólusetti mig fyrir lífstíð. 60% skattprósenta 10-30% atvinnuleysi og það að fólk sem nennir ekki að leita sér að vinnu hefur það jafn gott og maður sjálfur vinnandi eina til tvær vinnur er eitthvað sem ég vill ekki sjá. Það er mannskemmandi og nagar samfélagið innan frá.

1. Heilsugæslan á að vera gjaldfrjáls. En ég heyrði að ástæða þess að komugjöldum var komið á var að koma í veg fyrir að heilsugæslukerfið væri misnotað. Sighvatur Björgvins reyndi að koma tilvísanakerfi á, sem hefði komið að hluta til í veg fyrir þetta, en hann heyktist á því, svo þessi leið var sú eina sem fær var. Afsláttarkortin eiga svo að koma í veg fyrir að sjúkdómar slygi þá sem eru mikið veikir. Þætti eðlilegra að fara inn í meiri fjármuni í afsláttarkortin en komugjöldin vegna þessa.

2. Húsnæðisverð var orðið mun lægra en eðlilegt var, en nú er það orðið hærra en eðlilegt er. Aðgengi að lánsfé var ekki eðlilegt og því vildi Framsókn breyta. Húsnæðismarkaðurinn fór of hratt inn í nútímann og það olli sprengingu í verði. Framsókn ætlaði að fara úr 65% í 90% á fjórum árum, en bankarnir fóru þvert gegn eigin yfirlýsingum og yfirbuðu Íbúðalánasjóð, því þeir sáu fram á að fólk myndi ekki áfram fjármagna þau 20-30% sem upp á vantaði á þeim háu vöxtum sem þeir voru að bjóða húskaupendum. Í dag er húsnæðisverð ca það sama og hjá nágrannalöndunum en vextir eru enn of háir. Miðað við þau teikn sem eru á lofti munu vextir vera á niðurleið, svo þetta er tímabundið ástand.

3. Tannlæknaþjónustan í skólunum var orðin með þeim hætti að hún var ekki boðleg. Núna er verið að fara aðra leið og inn á stofurnar hjá þeim. Það er í stefnuskrá allra flokka held ég.

4. Sú ákvörðun var tekin á röngum forsendum og því röng. Framsókn hefur ályktað um það.

5. Í gangi eru byggingarframkvæmdir sem ættu að taka talsvert mikið á þeim vanda. Þennan málaflokk þarf að fara yfir og bráðabirgðamat skólanna þarf að gilda þangað til að greining hefur átt sér stað. Þannig er stefna Framsóknar til lausnar á því máli.

Já takk, haltu endilega áfram

[Heimir Eyvindarson, 7.5.2007 kl. 10:59]

Blessaður aftur.

1. Heilsugæslan á að vera gjaldfrjáls segirðu. En hún er það ekki. 1700 kall kostar viðvikið og enn er spurningunni ósvarað. Er það framsýni framsóknarflokksins að þakka? Þið hafið jú verið við völd í 12 ár samfleytt og lengst af með heilbrigðisráðuneytið, ekki satt? 

2. Tímabundið ástand er þetta varla. Í það minnsta mun húsnæðisverð halda áfram að hækka. Það mun altént klárlega ekki lækka úr þessu. Því er spurningunni enn ósvarað; Er það framsýni framsóknarflokksins að þakka að ungt fólk getur ekki með nokkru móti fest kaup á fyrstu eign án þess að steypa sér í skuldabrjálæði?

3. Þetta snýst ekki á neinn hátt um skólatannlækningar. Þegar við vorum ungir strákar fóru foreldrar okkar með okkur til tannlæknanna á Selfossi og borguðu ekkert fyrir. Er það framsýni framsóknarflokksins að þakka að þetta er ekki svona í dag?

4. framsókn hefur ályktað um það, mjög hallærislega að mínum dómi. Hefur framsókn beðist afsökunar á þessum gjörningi?

5. Þetta er ekkert svar Gestur, það veistu jafn vel og ég. Þið hafið verið við völd í 12 ár og þetta ástand hefur skapast í ykkar stjórnartíð. Er það framsýni framsóknarflokksins að þakka? 

Ég held ég bíði með að tína fleira til þar til einhver önnur svör en framsóknarklór berast

[Ingvar Valgeirsson, 7.5.2007 kl. 11:23]

Heimir minn, það er ekki bara hagvöxtur, það er líka kaupmáttaraukning og skattalækkanir á fólk, fé og fyrirtæki. Jafnvel hinir látnu eru skattlagðir minna, því erfðafjárskatturinn var lækkaður stórlega, sem og eignaskattur.

Margt mætti betur fara, það er rétt. En þá vil ég benda á að ef stjórnin fellur gæti Ingibjörg Sólrún orðið forsætisráðherra. Þegar hún gengdi einu valdamesta embætti landsins utan ráðherrastóla, sem borgarstjóri Reykjavíkur, gerði hún þá eitthvað sem gæti bent til þess að hún myndi gera betur en núverandi stjórnarflokkar? Hækkaðar álögur, nýjir skattar, eignaupptaka og NÍTJÁNFÖLDUN skulda borgarinnar án þess að nokkuð jákvætt gerðist.

Hin rammíslenska setning "fremur þann versta en þann næstbesta" á ekki við núna. Þó svo stjórnarflokkarnir séu skítugir upp fyrir haus sýnist mér þeir samt illskástu kostirnir. Minnst ógeðfelldu réttinrnir á miður geðslegum matseðli.

[Heimir Eyvindarson, 7.5.2007 kl. 11:54]

Illskásti kosturinn já........æ ég veit það ekki. Verður maður ekki alltaf að vona að það sé eitthvað betra til? Annars sé ég ekki að það skipti neinu máli að við séum að raupa þetta, eru Sjálfstæðismenn og Samfylking ekki svo að segja búin að mynda ríkisstjórn. Ég held að hún geti orðið ágæt.

[Heiðrún Dóra (IP-tala skráð) 7.5.2007 kl. 16:56]

http://xhvad.bifrost.is/  kíktu á þetta. Kjörið fyrir okkur sem vitum ekki hvað við eigum að kjósa.

Kveðja HDE 

[Hulda Bergrós Stefánsdóttir, 7.5.2007 kl. 17:43]

Ég sé Heimir minn að við hefðum átt að stofna "stjórnmálaflokk" saman fyrir kosningar hann gæti heitið FLOKKUR HINA VANÞAKKLÁTU .....en sé að við yrðum strax að "kljúfa" flokkinn því EKKI erum við sammála um BUGL 

Kv vanþakklátur kjósandi  

[Hulda Bergrós Stefánsdóttir, 7.5.2007 kl. 17:44]

Framsóknarmenn eru ÆSTIR í atkvæðið þitt !!!!!

[Rilli (IP-tala skráð) 7.5.2007 kl. 21:21]

Góðir punktar Heimir, heilsugæslan er ekkert frí og ég man þá daga  þegar maður fór í fylgd með fullorðnum til Púlla og tryggingarnar greiddu fyrir, það var allavega ekki annað að heyra.

Gestur minn, ég þekki nákvæmlega þennan ágæta tón sem þú gefur, hreinn framsóknarheimilistónn með þrjóskuívafi og pínu þröngsýni, sem er samt býsna skemmtilegur og einkennir góðan framsóknarmann.  Ég þekki þetta vel og hef staðið mig að þessari hegðun, en nú er í sömu sporum og Heimir, óákveðinn.   Ég er hinsvegar með góða  lausn fyrir "okkur" framsóknarmenn og hún er að kjósa Framsókn ALLS ekki í vor og tryggja að flokkurinn komist ekki í stjórn.  Þá fyrst geta framsóknarmenn farið að  líta í eigin barm og laga til, fyrr gerist það ekki.

 Kv/Rilli 

[Heimir Eyvindarson, 7.5.2007 kl. 23:14]

Þú hefur lög að mæla Rilli

[Heimir Eyvindarson, 9.5.2007 kl. 11:05]

Já nú fer maður alveg að henda í getraun, var að klára prófin í dag, Jibbííí!