Hermann Björgvinsson

Það var hringt í mig frá Spron um daginn. Erindið var að bjóða mér að verða viðskiptavinur bankans. Ég tók nú fremur fálega í það, en spurði þó hvaða kosti það gæti haft í för með sér. Sölumaðurinn var vel undir þá spurningu búinn og gat talið eitt og annað upp, bankanum til ágætis, m.a. það að ég gæti fengið lán með aðeins 17% vöxtum! Ég verð nú að viðurkenna að ég hrökk aðeins við.

Ég er svo lánsamur að borga ekki af neinum lánum nema húsnæðisláni okkar hjónaleysanna, sem ber 4,20% vexti, þannig að ég hreinlega veit ekki gjörla hvað teljast góð kjör á almennum lánamarkaði, en 17% vextir finnst mér altént ansi mikið. En sölumaðurinn geðþekki var nú aldeilis ekki sammála mér, og hélt áfram að reyna að sannfæra mig um að taka þessu kostaboði. Hann fullyrti m.a. að bankar og kortafyrirtæki rukkuðu allt að 25% vexti í einhverjum tilvikum! Svo skal böl bæta.............

Má ég minna á að um miðjan níunda áratuginn var Hermann nokkur Björgvinsson tíður gestur á forsíðum íslenskra blaða, og gjarnan fylgdi viðurnefnið "okurlánarinn" með. Þessi Hermann stundaði það sumsé að lána fólki pening á 18% vöxtum. Það þótti glæpsamlegt, gott ef honum var ekki stungið í steininn fyrir vikið!

 

Athugasemdir

[Pálmi Gunnarsson, 27.2.2008 kl. 21:47]

það er ekki sama Hermann og Hermenn

[Eiríkur Harðarson, 28.2.2008 kl. 01:39]

Bíddu nú hægur karlinn minn, hélt maðurinn að þú værir plagaður af MIKLU lánleysi EÐA ER ÉG AÐ RUGLA.

[Hulda Bergrós Stefánsdóttir, 28.2.2008 kl. 15:06]

[Hjalti Árnason, 9.3.2008 kl. 20:24]

HAHA! Góður punktur! Ég borga um 8% af mínu litla neysluláni