Handbækur

Handbækur eru til margra hluta nytsamlegar. Eins og nafnið gefur til kynna er handbók bók sem maður getur haft við höndina, og ég held að flestir leggi þann skilning í orðið að handbók sé uppflettirit af einhverju tagi. Grönspættebogen sem Rip Rap og Rup hafa ávallt við hendina er t.d. mjög gott dæmi um úrvals handbók, en í hana leita ungarnir í hvert sinn er þeir standa ráðþrota gagnvart einhverju - og finna undantekningarlaust prýðileg svör.

Ég held að við notum of lítið af handbókum. Líklega er það í mínu tilviki vegna þess að ég er einn af þeim sem telja sig vita flest um flest, og svoleiðis fólki finnst fremur vandræðalegt að fletta í bók sé það spurt ráða. Mun glæsilegra að svara strax, hátt og snjallt og af svo miklum sannfæringarkrafti að sá sem spyr velkist ekki eitt augnablik í vafa um ágæti svarsins! Jafnvel þó svarið sé þvæla. Þetta er kannski hreinlega hluti af þjóðareðlinu, það er miklu flottara að afgreiða alla hluti í hvelli en að ræða málin og skoða þau frá ólíkum hliðum, sbr. REI málið og ótalmargt fleira. Hefði t.d. sveitarstjóri Ölfushrepps gefið sér tíma til að glugga í handbók um góða siði í opinberri stjórnsýslu (sem ég geri ráð fyrir að sé til) þegar Orkuveitan bauð 45 milljóna mútugreiðslu gegn virkjunarleyfum hefði hann aldrei sagt já. Hann hefði séð það svart á hvítu að svona lagað gerir maður ekki. Og svo mætti lengi telja.

Það sem fékk mig til að leiða hugann að handbókum er nám mitt við Kennaraháskóla Íslands, en á leslista eins námskeiðsins eru nokkrar afbragðs handbækur. Þær eru skemmtilegar aflestrar og fullar af fróðleik, t.d. stendur í einni þeirri, Litrófi kennsluaðferðanna, að ætli maður sér að nota myndbönd við kennslu sé ekki ráðlegt að hafa minna sjónvarp en 27-28 tommu og einnig sé gott að hafa fjarstýringu við hendina. Ómetanlegur fróðleikur!

En til marks um það hve hlutverk handbóka er illilega misskilið hér á landi er okkur gert að læra efni þessara handbóka utanbókar fyrir próf. Það finnst mér mjög miður því það rýrir illilega gildi handbókanna - maður þarf þá ekkert á þeim að halda lengur. Tekur bara stóra sjónvarpið og fjarstýringuna umhugsunarlaust  

 

Athugasemdir

[Hulda Bergrós Stefánsdóttir, 25.11.2007 kl. 23:41]

bara eins og alla aðra daga

sjónvarp + fjarstýring - handbók = karlmaður

[Ingvar Valgeirsson, 26.11.2007 kl. 09:31]

Ég hélt að sölu á minni sjónvörpum hefði verð hætt hérlendis þegar Visa-rað var fundið upp...

[Bryndís (IP-tala skráð) 26.11.2007 kl. 16:43]

Góður!

[Hjalti Árnason, 27.11.2007 kl. 18:46]

Þú ert ekki einn, ég er í mínum tækniskóla að læra 30 ára gamla rafeindatækni í þriðja skipti. sem betur fer eru engin alvöru próf. eitthvað þarf ég að læra, en inn í einkunnina eru teknir hlutir eins og mæting, áhugi, félagsleg samskipti o.fl. opinn og jákvæður skratti eins og ég getur ekki fallið!

[Eiður Ragnarsson, 28.11.2007 kl. 00:09]

Það er vinsæl aðgerð þegar allt er komið í óefni að lesa handbækur, en alls ekki fyrr... 

Það er til aðgerð sem gegnur undir skamstöfuninni R.T.F.M. hjá nokkrum félögum mínum, en til hennar er gripið þegar allt er komið í óefni.  Þessi skamstöfun útleggst Read The Fucking Manual, en við hér á skerinu erum nú ekki þekkt fyrir að nota þessslags heldur fiktað með ómældu pirri og tímaeyðslu þar til að búið er að redda málunum, eða allt komið í óefni...

Grænjaxlablókina hinsvegar, myndi ég hafa með mer hvert sem er, ef hún væri til.....

[Eiríkur Harðarson, 28.11.2007 kl. 00:47]

Heimir þú bara hlýtur að ÞURFA handbók á Hvergerðingana úr því að þú þurftir að álpast út í Hveragerði.

[Golli (IP-tala skráð) 29.11.2007 kl. 23:58]

Þú ert allveg svakalegur höfundur, "hné og olnbogar" allveg frábær setning.

Golli.

[Anna Sigga, 30.11.2007 kl. 19:12]

Þú ert fínn Heimir