Starfslaun listamanna

Íslenska ríkið borgar listamannalaun í bunkum ár hvert. Í ár eru a.m.k. 150 manns á launum hjá okkur við að skapa list, u.þ.b. helmingur þeirra fær umtalsverða upphæð (eins til þriggja ára laun), en aðrir minna.

Persónulega er ég alfarið á móti slíkum ölmusum til einstaklinga sem telja sig fremja merkilegri list en aðrir og gæti rætt um það í löngu máli, en ég geymi það til betri tíma.

Ég vil hinsvegar leggja það til að Íslenska handboltalandsliðið fái á einu bretti starfslaun listamanna í a.m.k. 1 ár. Guðmundur Guðmundsson má síðan fá laun frá ríkinu til æviloka mín vegna. Hann er mun betur að því kominn en mörg afætan á ríkissjóði. Og strákarnir allir raunar.

Til hamingju Ísland!

Athugasemdir

[Hulda Bergrós Stefánsdóttir, 24.8.2008 kl. 14:49]

Handbolti er list

Til hamingju Ísland

[Ingvar Valgeirsson, 24.8.2008 kl. 15:17]

Ég er sammála þér með listamannalaunin, þ.e. ég er alfarið á móti þeim. Asnalegt að fólk fái borgað frá ríkinu (þ.e. okkur) fyrir að sinna áhugamálinu sínu. Að sama skapi á íþróttafólk ekki að fá neitt - það fær andsk... nóg fyrir. Skemmst að minnast múltíhundruð milljóna króna stúkunnar hér í borginni. Það er nóg af stórfyrirtækjum og einstaklingum sem eru til í að styrkja þetta.

Varðandi listamannalaun - af hverju voru t.d. Rúnni Júl og Stebbi Hilmars að fá þau? Það er reyndar betur við hæfi að þeir fái þau en einhverjir sem enginn nennir að hlusta á, horfa á, lesa eða skipta sér af, en þeir eru jú fullfærir um að vinna fyrir sér. Meðan löggan, kennarar, hjúkrunarfólk og þess háttar starfsstéttir fá ekki nógu vel borgað er hreinlega glæpsamlegt að moka peningum í svona hégóma.

Ef einhverjir latteþambandi og hassreykjandi virkjunarandstæðingar geta ekki fjármagnað þangskúlptúrinn sinn geta þeir bara unnið með listinni - það vantar örugglega einhvern við skúringar á Hrafnistu.

[Soffía Valdimarsdóttir, 24.8.2008 kl. 17:18]

Mér þykir þið aldeilis segja mér tíðindin! Og þó, þetta er síungt ágreiningsefni. Sem vísar auðvitað til ennú eldra deiluefnis: Hvað er list, hver ákveður hvað er list og hvenær hættir list að vera list og verður eitthvað allt annað, kannski bara skrautmunaiðnaður sem leitast við að þjóna neytendum sínum? Spyr sú sem ekki veit................

Svo er til í dæminu að ekkert sé eins mikil list og alþýðulist sem þekkir engan akademískan lærdóm. Hvað finnst ykkur um það?

[Guðmundur M Ásgeirsson, 24.8.2008 kl. 18:18]

Djöfull er ég sammála! Skella síðan fálkaorðu á þá alla við heimkomuna!!!

[Heiðrún Dóra (IP-tala skráð) 25.8.2008 kl. 16:12]

Ég sé að Ólafur Ragnar hefur lesið bloggið og er búinn að ákveða að sæma þá alla Fálkaorðunni. Einhver bloggaði um fréttina að þetta væri svo sem í lagi en við mættum ekki missa okkur yfir þessu. Auðvitað megum við missa okkur, við EIGUM að missa okkur yfir strákunum okkar!

[Heimir Eyvindarson, 25.8.2008 kl. 22:45]

Ekki spurning. Það hafa nú aldeilis ómerkari menn fengið þessar blessuðu orðudruslur í gegnum tíðina. Legg til að Guðmundur fái stórriddarakrossinn!

[Golli (IP-tala skráð) 26.8.2008 kl. 18:44]

">Ekki spurning. Það hafa nú aldeilis ómerkari menn fengið þessar blessuðu orðudruslur í gegnum tíðina. <"

............t.d. allir ráðuneytisstjórarnir?? sem hafa gengið þjakaðir til vinnu, fyrir sólarupprás, á hverjum degi.

Úff, eða elsku hjartans diplómatarnir okkar, sem er búið að sáldra um á hinum hættulegustu slóðum jarðar.  Umferðin getur verið "murder" í NY, París og Róm.

Golli.