Sagan skrifuð í Sandgerði

Mig langar að segja ykkur eina litla sögu. Þannig er að næst komandi laugardagskvöld leikur hljómsveitin Á móti sól á stórdansleik í samkomuhúsinu í Sandgerði, en dansleikurinn er liður í Sandgerðisdögum sem er árleg bæjarhátíð Sandgerðinga og nærsveitunga.

Það er í sjálfu sér ekki í frásögur færandi, en hitt er ansi merkilegt að það var einmitt í samkomuhúsi Sandgerðinga sem hljómsveitin Á móti sól steig sín fyrstu skref á sveitaballamarkaðnum, í marsmánuði 1996. Þessu hyggjumst við fagna á alla mögulega vegu.

Fyrsta ballið er stór áfangi í sögu hverrar hljómsveitar og oft getur verið erfitt að komast að í hinum harða heimi sem skemmtanabransinn á Íslandi getur verið. Misjafnt er hvaða leiðir eru hljómsveitum færar þegar þær telja sig vera tilbúnar til að stíga fyrstu skrefin, og eins er misjafnt hvaða aðferðum hljómsveitir beita til að koma sér á framfæri.

Og þá er loks komið að sögunni sem ég lofaði í upphafi. Í okkar tilfelli var þeim bellibrögðum beitt að ég hringdi heldur mannalegur í ýmis vertshús víðsvegar um landið og bauð fram þjónustu sveitarinnar, með þeim formerkjum að um vel þekkta og reynda sveitaballasveit væri að ræða. Sem var náttúrlega helber lygi! Nokkrir bitu á agnið og fyrstur til þess var viðkunnanlegur vert í Sandgerði, sem réði hljómsveitina á ball í Samkomuhúsi bæjarins. Á undan ballinu stóð hann fyrir tísku- og hárgreiðslusýningu og eflaust var fyrst og fremst því að þakka að ballið var sæmilega sótt. Í það minnsta var ekki hægt að þakka vinsældum hljómsveitarinnar það, enda sveitin með öllu óþekkt og óreynd. Ballið gekk þó sæmilega, uppistaðan á efnisskránni voru bítlalög og aðrir slagarar úr söngbókum og nokkuð var um endurtekningar.

Þar með er þessi litla lygi opinberuð. Vertinn góði er að sjálfsögðu boðinn á ball, það er nú það minnsta sem við getum gert fyrir hann .

Athugasemdir

[Hulda Bergrós Stefánsdóttir, 27.8.2008 kl. 21:56]

Einhverstaðar verður allt fyrst

[Soffía Valdimarsdóttir, 27.8.2008 kl. 22:01]

Góð lygi er gulli (og silfri) betri. Það hef ég alltaf sagt.

[Hulda Bergrós Stefánsdóttir, 27.8.2008 kl. 22:08]

http://www.mbl.is/mm/fasteignir/fasteign/?eign=317905

[Ingvar Valgeirsson, 27.8.2008 kl. 23:06]

Já, fyrsta ballið er einatt bókað með þeim orðum að bandið sé alvant og búið að spila úti um allt...

[Sæmi (IP-tala skráð) 28.8.2008 kl. 14:16]

Við stóðum okkur nú samt nokkuð vel og mig minnir að REM slagarar hafi slegið í gegn og tískusýningin var nú ekkert slor að vísu fékk Þórir aðeins meira út úr henni en við hinir þegar hann opnaði vitlausa hurð

[Ingvar Valgeirsson, 30.8.2008 kl. 14:19]

Ég leyfi mér að efast um að það hafi verið óvart...

:)