Afhending styrkja

Hljómlistarfélag Hveragerðis er lítill tónlistarklúbbur sem við stofnuðum fyrir u.þ.b. ári síðan, nokkrir tónlistarmenn hér í bænum. Í stjórn félagsins sitja auk mín þeir Kristinn Harðarson, Páll Sveinsson, Sigurður Egilsson, Sævar Helgason og Sölvi Ragnarsson, en við erum allir formenn .

Einu lög félagsins eru á þá lund að enginn formaður þiggur laun fyrir vinnu sína, en hlutverk félagsins er fyrst og fremst að efla og styrkja tónlistarlíf í bæjarfélaginu, sem og að láta gott af sér leiða á sem flestan hátt.

Þeir viðburðir sem félagið kom að, eða stóð fyrir, á síðasta ári voru eftirfarandi: Minningartónleikar um Bergþóru Árnadóttur í tengslum við Blómstrandi daga, styrktartónleikar á Hótel Örk í október s.l., styrktartónleikar í Hveragerðiskirkju á aðventunni og svo að sjálfsögðu Sölvakvöldið.

Fyrir tónlistarflutninginn á Blómstrandi dögum fékk félagið greitt og eins varð í fyrsta sinn hagnaður af Sölvakvöldinu. Því fannst okkur rétt að drífa í að styrkja góð málefni. Við blésum af því tilefni til styrkjahátíðar í Listasafninu þar sem við buðum upp á rammíslenskar veitingar og fallegan söng Hverafuglanna, sem er kór eldri borgara hér í bæ, - og deildum út styrkjum.

Að þessu sinni voru það fjórir aðilar sem fengu styrki.

Hveragerðiskirkja fékk styrk að upphæð 200 þúsund krónur. Upphæðin rennur í sjóð sem kirkjan hefur yfir að ráða og ætlað er að hjálpa fólki í fjárhagskröggum. Nokkuð er um að fólk leiti til kirkjunnar eftir fjárhagslegri aðstoð og ekki ólíklegt að þörfin fyrir slíkt muni aukast enn frekar eftir því sem líður á þennan kreppuvetur.  

Hljómsveitin Hitakútur fékk styrk að upphæð 100 þúsund krónur til að fjármagna upptökur á sinni fyrstu hljómplötu, en drengirnir eru einmitt að leggja lokahönd á gripinn þessa dagana.

Hljómsveitin Húrrígúrrí fékk styrk að upphæð 50.000 krónur til að fjármagna upptökur á eigin efni, en þeir eru að stíga sín fyrstu skref í þeim efnum á næstu vikum.

Þá fékk Grunnskólinn í Hveragerði afhentan DVD spilara af fullkomnustu gerð, ásamt tilheyrandi tengibúnaði. Formenn Hljómlistarfélagsins munu sjálfir sjá um að setja búnaðinn upp í sal skólans, en myndsýningarbúnaður skólans hefur nú um nokkurt skeið verið í ólagi. 

Það er von okkar í Hljómlistarfélaginu að starfsemin verði áfram svo blómleg að við getum gert slíka styrkjaafhendingu að árlegum viðburði.

Takk fyrir okkur

Athugasemdir

[Inga Lóa (IP-tala skráð) 24.1.2009 kl. 08:29]

Gaman að lesa eitthvað svona jákvætt á þessum síðustu og verstu. Þetta er fábært hjá ykkur. Það mættu miklu víðar vera svona flottir formenn.......

[Heimir Eyvindarson, 24.1.2009 kl. 09:52]

[Hulda Bergrós Stefánsdóttir, 24.1.2009 kl. 21:13]

Glæsilegt, til hamingju með það

[Sigurjón (IP-tala skráð) 25.1.2009 kl. 00:58]

Vil enn og aftur þakka fyrir þetta kærlega.

Þetta er svo mikill heiður:)

Takk takk 

[Kolla (IP-tala skráð) 25.1.2009 kl. 12:29]

Húrra fyrir ykkur!!!

[Soffía Valdimarsdóttir, 25.1.2009 kl. 20:11]

Takk fyrir mig og mína.

[Heimir Eyvindarson, 26.1.2009 kl. 01:19]

Sömuleiðis

[Sævar Logi (IP-tala skráð) 26.1.2009 kl. 19:51]

Frábært framlag og nú er bara að horfa fram á við í átt að blómstrandi sumri og halda áfram að lyfta Hvergerðsku tónlistarlífi á æðra plan

btw. er hægt að fá einkaleyfi á orðinu Hvergerðskt þó það sé í óþjálli kantinum?

[Guðrún Hafsteins. (IP-tala skráð) 27.1.2009 kl. 08:57]

Stórkostlegt framtak. Til hamingju með þetta Hvergerðingar, Sunnlendingar og aðrir landsmenn.

Mikið erum við Hvergerðingar heppin að eiga ykkur að!

Þið eigið allar þakkir skildar og haldið áfram á sömu braut.

[Heimir Eyvindarson, 28.1.2009 kl. 08:59]

Takk