Hreint ekki svo ligeglaðir

Ég heyrði í útvarpinu áðan að það fer í taugarnar á meirihluta dönsku þjóðarinnar að nýbakaðar mæður séu að þvælast inni á kaffihúsum með börnin sín. Ekki nóg með það heldur er meirihluti þjóðarinnar hlynntur því að brjóstagjafir verði hreinlega bannaðar á kaffi- og veitingahúsum.

Hvað er eiginlega að verða með þessa frændur vora sem fyrrum voru svo frjálslyndir, einkum og sér í lagi hvað varðaði brjóst og þess háttar útbúnað?

Hopsasa på sengekanten hvað!!!

 

Algjör yfirburðamaður!

Keith Richards er einn mesti töffari sem uppi hefur verið, það er engin spurning og ekkert meira um það að segja!

Tók föður sinn í nefið

Á móti sól að vakna til lífsins

Við félagarnir höfum ekki spilað mikið síðan um áramót því Magni hefur verið meira og minna í Bandaríkjunum. En nú er framundan árleg páskagleði. Við blásum í djammlúðrana og förum í heljarmikla rútuferð um landið.

Dagskráin er svona:

Miðvikudagur - SJALLINN, Akureyri
Föstudagur: ÖLFUSHÖLLIN
Laugardagur: FÉLAGSHEIMILIÐ, Blönduósi
Sunnudagur: ÍÞRÓTTAHÚSIÐ JAÐARSBÖKKUM, Akranesi

Góða skemmtun

Sjónvarpsgláp

Ég held að ég hafi rekist á snilldarsíðu á netinu rétt í þessu. http://www.tv-links.co.uk/index.do 

Hér er hægt að horfa frítt á allskonar sjónvarpsþætti án þess að hala niður einhverja vitleysu. Vonandi.

Ég er allavega að klára næstsíðasta þáttinn af Prison Break, án nokkurra vandræða.

Lambakjöt á diskinn minn?

Það er svo skelfing mikið að gera hjá mér að mér dettur ekkert sniðugt í hug til að skrifa. En frekar en að gera ekki neitt ætla ég að skrifa eina nöldurfærslu. Biðst afsökunar fyrirfram.

Þannig er að ég er aðeins farinn að spá í hvað ég ætla að hafa í páskamatinn og fór þessvegna í fyrradag og skoðaði mig um í Nóatúni, hér á Selfossi. Einhvernveginn var ég ekkert sérstaklega vel stemmdur og þessvegna fór útbúnaðurinn á lambakjötinu í taugarnar á mér, eins og reyndar svo oft áður - eða allt frá því að ég fór að telja mig hafa eitthvað vit á lambakjöti, sem hefur líklega verið fyrir um 20 árum þegar ég vann við kjötsölu o.fl. hjá S.S.

Ég held að fáir hafi komið jafnmiklu óorði á íslenskt lambakjöt og þetta batterí sem hefur séð um markaðssetninguna á því undanfarin ár og áratugi. Ég veit ekki hvað batteríið heitir en þetta eru öflug samtök sem virðast hafa talsverðan pening milli handanna - líklega peninga ríkisins. Slagorðið er: Lambakjöt - Náttúrulega gott  ....er það ekki rétt munað hjá mér annars?

Ég man að ég var einmitt að vinna hjá S.S. þegar þessi ósköp byrjuðu, en þá var farið að selja lambakjöt í hálfum skrokkum - niðursagað í poka. Neytendavænar umbúðir þess tíma. Ég var sjálfur einn af þeim sem sagaði ofan í þessa poka og þessvegna veit ég nákvæmlega hvað í þeim var og hvað vakti fyrir sölunefndinni.

Í þessa poka fóru lambskrokkar sem voru aðeins undir meðalþyngd, þ.e. frekar magrir og þar af leiðandi var kjötið ekki í hæsta gæðaflokki, en svosem ekki vont heldur. Aðal markmiðið var samt, eins og verið hefur allar götur síðan, að koma frampartinum út! Fyrir þá sem vita þá er framparturinn semsagt hvorki hryggur né læri, sem ég held að flestir geti skrifað undir að séu bestu bitar lambsins rétt eins og á öðrum skepnum. Frampartur er fínn í súpukjöt, saltkjöt, kjöt í karrý, gúllas og fleiri prýðisgóða rétti, t.d. thailenska, en hann á lítið skylt við góða steik. En semsagt, trompið í þessum pokum voru framhryggjarsneiðar sem fólk átti að grilla rétt eins og kótilettur og lærisneiðar. Afhverju í ósköpunum?  

Ég velti því stundum fyrir mér hver kynni mín af lambakjöti yrðu ef ég væri nú í þeim sporum að hafa ekki þessa lágmarksvitneskju sem ég þó hef um eðli og eiginleika þess. Hefði bara heyrt einhverja sérfræðinga rausa um gæði þess í fjölmiðlum, sérfræðinga sem flestir þiggja að ég hygg laun frá þessum sölusamtökum fyrir að dásama íslenska lambið. Og heyrast nota bene sjaldnast tala um framparta. 

Hvað yrði t.d. á vegi mínum ef ég færi út í búð til að kaupa lambakjöt? Það er nánast pottþétt að það yrði lambasteik í fallegum, sérmerktum umbúðum á tiltölulega hagstæðu verði. Með eldunarleiðbeiningum og jafnvel tilbúinni sósu. Hljómar ágætlega, og er til í lange baner í flestum ef ekki öllum verslunum.

En þegar steikin væri komin úr ofninum og ég færi að smakka dýrðina, sem svo dásömuð hefur verið af helstu steikarsérfræðingum landsins, rynnu sjálfsagt á mig tvær grímur. Bitarnir ólseigir, löðrandi í fitu og fullir af einhverju rusli sem minnti helst á gúmmíteygjur -semsagt sinum. Hér væri nefnilega blessaður framparturinn kominn enn eina ferðina. Ég myndi ekki láta mér detta í hug að kaupa þetta helvíti aftur er ég hræddur um.

Það er eins og það sé einhver árátta í íslenskum kjötkaupmönnum, og kannski kaupmönnum yfirleitt, að leggja ofurkapp á að koma illseljanlegri vöru út. Og glotta svo ef það tekst. Í gegnum tíðina hefur fólk viljað hrygg og læri og framparturinn óhjákvæmilega síður gengið út og þessvegna hefur hverju átakinu af öðru verið hrint í framkvæmd til að auka söluna á honum. Það er í sjálfu sér vel skiljanlegt, en afhverju þarf að ljúga því að fólki að hér sé dýrindis steik á ferðinni?  

Þessi sölusamtök virðast fá ótakmarkað fé til að auglýsa lambakjöt, hver leiðinlega auglýsingin á fætur annarri um gæði lambakjöts hefur í það minnsta komið fyrir sjónir manns á undanförnum árum, svo ekki sé minnst á þáttöku samtakanna í ýmsum sýningum, sjónvarpsþáttum o.s.frv bæði hérlendis og erlendis. Það er allt gott og blessað, og af hinu góða að kynna gæði kjötsins, en hvað svo?

Svo fer fólk útí búð og ætlar að grípa dýrðina með sér og þá er búið að dulbúa einhverja bévítans framparta sem steikur út um alla búð! Meira að segja ef maður er svolítið klár og fer beint í kjötborðið og biður um hrygg þá fær maður dálítið af framparti með! Lambahryggur er nefnilega iðulega sagaður þannig að það er farið dálítið upp í frampartinn þannig að það fylgja með eins og 4-5 sentimetrar af framparti! Kænska kjötkaupmannsins ríður ekki við einteyming.

Mér er til efs að þetta háttalag auki sölu á lambakjöti. Ég er altént svo gamaldags að ég trúi því að gæði séu besta auglýsingin, sérstaklega í þeim tilfellum þar sem varan sjálf er vel þekkt. Það hafa allir heyrt um lambakjöt, það þarf ekki að kynna það fyrir fólki eins og um ókunnuga vöru sé að ræða, en ég hygg að eftir þessar aðfarir þurfi að fara að kynna gæði kjötsins fyrir venjulegu fólki. Fólkinu sem fór út í búð og fékk frampart og hefur síðan þá ekki dottið í hug að bragða á lambakjötsóþverranum.

Afhverju er ekki hægt að kaupa svona vel búnar og fallega framsettar steikur úr hrygg og læri? Afhverju er ekki hægt að kaupa hrygg án þess að frampartur fylgi með og afhverju er ekki hægt að kaupa læri án þess að hálfur hækillinn fylgi með?

Ég er alveg viss um að lambakjöt myndi seljast miklu betur ef gæðin væru meiri. Það er til skammar að í landi þar sem gæði lambakjöts eru básúnuð daginn út og inn, á kostnað ríkisins, sé ekki hægt að fara út í búð og kaupa almennilegt kjöt - og hana nú! 

Selfoss-Reykjavík - Selfoss

Getur einhver sagt mér afhverju það kostar 1000 krónur með rútu frá Selfossi til Reykjavíkur en 1200 krónur til baka? Sömu leið með sama rútufyrirtæki.......

Kristján Hressi

Kristján Hreinsson er óhress í dag, eins og svo oft áður. Nú er skáldið súrt út í Svein Sigurðsson höfund framlags okkar til Eurovision keppninnar í ár.

Málið er að Kristján gerði íslenska textann við lagið og var tilbúinn með enskan texta líka, sem Sveinn þessi var búinn að samþykkja að nota ef þeir kæmust í keppnina góðu. Á úrslitakvöldinu söng Eiríkur einmitt brot úr þessum texta Kristjáns, en ég hélt reyndar að Eiríkur væri bara að skálda eitthvað á staðnum því það var nú ekki mikið kjöt á beinunum. 

Hver sem ástæðan svosem er ákvað Sveinn að kalla til enskan textahöfund, Peter Fenner að nafni, líklega frændi Fríðu Fenner sem hefur algjörlega sneitt hjá kjöti og fiski um talsverða hríð en það er önnur saga.

Það er í sjálfu sér skynsamlegt því oft verða tilraunir Íslendinga til textagerðar á ensku hjákátlegar og jafnvel þó mér finnist ekki mikið til íslenskra texta Kristjáns koma er ekki annað hægt að segja en að hann hafi gott vald á málinu, hann bara hittir aldrei á neitt skemmtilegt.

Samkvæmt sýnishorninu sem Eiríkur söng úr enska texta Kristjáns á úrslitakvöldinu er Kristján álíka óhittinn á ensku og þegar við bætist kauðaleg málnotkun er ekki von á góðu. En ég hef þó fulla samúð með Kristjáni ef rétt reynist að Sveinn hafi gengið bak orða sinna. Það er aldrei stórmannlegt. Ég væri líka súr ef mér hefði verið hafnað og texti sem inniheldur hendingar eins og  ........rock and roll can heal your soul when broken hearts loose all control......... og..........a passion killed by acid rain a roller coaster in my brain....tekinn fram yfir minn. Þá er maður lítils metinn.

Raggi Bjarna ekki með belti!

Eitt leiðinlegasta útvarpsefni sem ég veit er útvarp umferðarráð, eða umferðarstofa eða hvað þetta heitir. Þetta ágæta fólk sem vinnur við að predika hvernig við eigum að keyra á það af einhverjum ástæðum allt sammerkt að tala til okkar hinna eins og við séum heilalausir bjánar. Ef þetta fólk kæmi fram af heiðarleika, en ekki heilagleika, held ég að yrði tekið mun meira mark á því.

Ég vil taka það strax fram að ég er fylgjandi öflugu fræðslu- og forvarnarstarfi í þessum málum, sem og öðrum, en ég leyfi mér að gera athugasemdir við framsetningu Umferðarstofu. Það er t.d. ekki ofsaakstur þegar reyndir ökumenn á nýjum, vel búnum bílum keyra á 110 km. hraða á við góð skilyrði á þjóðvegi nr.1. Það er heldur ekki ofsaakstur og vítaverður glannaskapur að taka fram úr þegar keyrt er niður Lögbergsbrekkuna, eins og Sigurður Helgason hjá Umferðarstofu hefur haldið fram. Það er vissulega óbrotin lína þar, sem er bannað að keyra yfir, en rökin fyrir þeirri línu eru engin.

Óbrotnar línur eru, samkvæmt upplýsingum frá Vegagerðinni, fyrst og fremst settar þar sem akstursskilyrði eru þannig að ekki sést hvað framundan er, t.d. á blindhæðum eða í kröppum beygjum, en sé keyrt niður Lögbergsbrekkuna sést vegurinn framundan svo langt sem augað eygir svo það er dálítið stórt upp í sig tekið að halda því fram að það sé vítavert að taka fram úr þar. Samt sem áður hefur Sigurður lagt undir sig heilu fjölmiðlana til að básúna þennan glannaskap.

Ég er allavega þeirrar skoðunar að það eigi að tala við ökumenn eins og þeir séu vitibornar manneskjur. Það er munur á því að keyra aðeins hraðar en lögin segja til um við bestu aðstæður á nýjum bíl og t.d. því að þeysa um íbúðahverfi á margföldum leyfilegum hámarkshraða. Það er glannaskapur. En af því að Umferðarstofa kýs að tuða yfir öllum litlu atriðunum sem aflaga kunna að fara í umferðinni, allt frá stefnuljósanotkun til stöðumælabrota, verður málflutningur þeirra smám saman eins og hvert annað suð sem enginn nennir að veita athygli, sem er sorglegt því umferðarfræðsla er vissulega nauðsynleg og málstaðurinn svo sannarlega góður.

Það kæmi mér t.d. ekki á óvart þó Umferðarstofa gerði athugasemd við það að í nýrri Olís auglýsingu stígur Raggi Bjarna upp í bíl og brunar af stað án þess að spenna á sig beltið!

Prison Break

Stöð 2 gefur þá skýringu á því að Prison Break var ekki á dagskrá í kvöld að þættirnir séu sýndir samtímis hér og í Bandaríkjunum. Það er reyndar ekki alveg rétt því á síðu FOX sjónvarpsstöðvarinnar má sjá að 20.þátturinn var sýndur þar í gær þannig að það hefði verið leikur einn fyrir Stöð 2 að sýna þann þátt í kvöld.

En. Ef þeir hefðu gert það þá hefði serían, að því gefnu að þættirnir verði 22 eins og í síðustu seríu, klárast 3.apríl og þar af leiðandi ekki náð yfir á nýtt áskriftartímabil, sem hefst einmitt 5.apríl.

Gaman að þessu

 

Enn af sumarbúðum ráðstjórnarríkjanna

Það rifjaðist upp fyrir mér um daginn þegar ég var að fara í gegnum gamlan bókabunka að foreldrar mínir sendu mig aldeilis ekki einan og óstuddan, 12 ára gamlan, í sumarbúðir ráðstjórnarríkjanna í Austur-Þýzkalandi. Nei nei nei...í vasa minn settu þau handbók í þýzku sem ég hef líklega átt að grípa til ef einhver vandræði yrðu á vegi mínum. Bókin er frá árinu 1962 og hefur að geyma setningar á borð við þessar:

Bitte, ziehen Sie diesen zahn, sem þýðir; Gerið svo vel að draga þessa tönn.

Ich möchte die Nägel spitz haben, sem þýðir víst; Ég vil hafa neglurnar frammjóar

og síðast en ekki síst:

Zieht es ihnen? Sem útleggst: Er súgur hjá yður? 

Já já strákurinn er hólpinn með þetta upp á vasann.......